ខេត្តកំពង់ធំ ថ្ងៃទី២៦ ខែធ្នូ ឆ្នាំ២០១៧ លោកធីវ វណ្ណធីរ ប្រធានមន្ទីរកសិកម្ម រុក្ខាប្រមាញ់និងនេសាទខេត្តកំពង់ធំ បានឱ្យដឹងកាលពីថ្ងៃចន្ទ ៨កើត ខែបុស្ស ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២៥ ខែធ្នូ ឆ្នាំ២០១៧ ថាតាមការធ្វើតុល្យភាពស្បៀងប្រចាំឆ្នាំ២០១៧ សម្រាប់ប្រីប្រាស់ឆ្នាំ២០១៧-២០១៨ ខេត្តកំពង់ធំសល់ស្បៀងលើសពីតម្រូវការប្រើប្រាស់ក្នុងខេត្តចំនួន៣៣៦.០០០តោនអង្ករ។
លោកធីវ វណ្ណធីរ បានបញ្ជាក់ថា នៅរដូវវស្សាឆ្នាំ២០១៧ ប្រជាកសិករនៅខេត្តកំពង់ធំអនុវត្តន៍ធ្វើស្រែបានចំនួន ២១៥.០០៨ហិកតា ខូចខាតដោយទឹកជំនន់អស់ចំនួន ១.៧០២ហិក តា និងស្ដារឡើងវិញបានចំនួន ១០០ហិកតា នៅសល់ផ្ទៃដីប្រមូលផលចំនួន២១៣.៤០៦ហិក តា ទទួលបានទិន្នផលមធ្យម ២,៦៤០តោនក្នុង១ហិកតា ទទួលបានបរិមាណផលចំនួន៥៦៣.៣៤២តោន។ ការអនុវត្តធ្វើស្រូវប្រាំងឆ្នាំ២០១៧-២០១៨ នេះតាមការប៉ាន់ស្មានបានចំនួន ៥២.២១៧ហិកតា ទទួលបានទិន្នផលមធ្យម ៤,៤៥៦តោន ក្នុង១ហិកតា ទទួលបានបរិមានផលចំនួន ២៣២.៦៨៣តោន។
សរុបបរិមាណផលស្រូវប្រាំងនិងស្រូវវស្សាមានចំនួន ៧៩៦.០២៤តោន និងបានកាត់ចេញ១៣ភាគរយលើបរិមាណផលស្រូវសរុបសម្រាប់ទុកពូជ និងការបាត់បង់ពេលប្រមូលរួចហើយ។ ដោយឡែកស្រូវសម្រាប់ប្រើប្រាស់នៅសល់ក្រោយកាត់ចេញ១៣ភាគរយមានចំនួន ៦៩២.៥៤១តោន។សរុបស្បៀងគិតជាអង្ករមានចំនួន៤៤៣.២២៦តោន។ តម្រូវការស្បៀងសម្រាប់ប្រើប្រាស់ក្នុងខេត្តក្នុង១ឆ្នាំចំនួន ១០៧.១៣៥តោន ដូច្នេះបរិមាណស្បៀងនៅសល់លើសពីតម្រូវការប្រើប្រាស់ក្នុងខេត្តចំនួន៣៣៦.០៩១តោនអង្ករ បើគិតជាស្រូវវិញមានចំនួន ៥២៥.១៤៣តោន៕
