#ខេត្តកំពង់ធំ

នាព្រឹកថ្ងៃទី២៥ ខែ មិថុនា ឆ្នាំ២០២៤ លោក ប៉ែន វណ្ណរិទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានដឹកនាំ លោក ចាន់ បញ្ញាវ័ន្ត ប្រធានការិយាល័យផលិតកម្ម និងបសុព្យាបាលខេត្ត និង មន្ត្រីជំនាញ ភ្នាក់ងារសុខភាពសត្វភូមិ និងមានកិច្ចសហការពីលោក អ៊ុត វណ្ណរ៉ា អភិបាលនៃគណ:អភិបាលស្រុកកំពង់ស្វាយ រួមនិងមន្ត្រី អាជ្ញាធរមូលដ្ឋាន បានបើកយុទ្ធនាការចាក់ថ្នាំការពារជម្ងឺឆ្លងសត្វគោក្របី ជូនដល់កសិករចិញ្ចឹមសត្វ ស្ថិតនៅភូមិសំរោង ឃុំត្រពាំងឬស្សី ស្រុកកំពង់ស្វាយ ។

ជាលទ្ធផលក្រុមការងារ សម្រេចចាក់សត្វបានចំនួនវសរុប250ក្បាលក្នុងនោះសត្វក្របី13ក្បាល និងបានផ្តល់ជូនវ៉ាក់សាំងការពារជម្ងឺសាទឹកសត្វ គោ ក្របីចំនួន1000កម្រិត និងថ្នាំព្យាបាលមួយចំនួនដល់មន្ត្រីទទួលបន្ទុកសុខភាពសត្វ និងផលិតកម្មសត្វ ប្រចាំស្រុកកំពង់ស្វាយ សម្រាប់ដឹកនាំភ្នាក់ងារសុខភាពសត្វភូមិចុះចាក់បន្តនៅក្នុងដែនសមត្ថកិច្ចរបស់ខ្លួន ។

ឆ្លៀតក្នុងឱកាសនេះលោក ប៉ែន វណ្ណរិទ្ធ បានសំណេះសំណាលជាមួយបងប្អូនប្រជាកសិករដែលមានសត្វគោក្របី ដើម្បីចង់ដឹងពីស្ថានភាពជំងឺសត្វដែលកំពុងតែរីករាលដាលនៅក្នុងសហគមន៍ និងក្រើនរំលឹកដល់បងប្អូនប្រជាកសិករដែលមានសត្វគោក្របីឱ្យយកចិត្តទុកដាក់ចំពោះទីកន្លែងរស់នៅរបស់សត្វគោក្របី សម្អាតទ្រុងជាប្រចាំ បាញ់ថ្នាំសម្លាប់មេរោគឱ្យបានញឹកញាប់យ៉ាងហោច២ដងក្នុង១ខែ ផ្តល់ទឹក និងស្មៅព្រមទាំងចំបើងឱ្យស៊ីគ្រប់គ្រាន់ យកសត្វមកចាក់ថ្នាំការពារជំងឺឆ្លងឲ្យបានទៀងទាត់តាមការណែនាំពីមន្ត្រីជំនាញ(២លើកក្នុង១ឆ្នាំ) ប្រសិនបើមានករណីសង្ស័យថាសត្វគោក្របី មានជំងឺសូមផ្ដល់ដំណឹងដល់ភ្នាក់ងារសុខភាពសត្វភូមិ និងអាជ្ញាធរមូលដ្ឋានជាបន្ទាន់ ដើម្បីបង្កាទប់ស្កាត់ការឆ្លងរីករាលដាលពីភូមិមួយទៅភូមិមួយ ៕